مسمن بطريقة الفطير المشلتت معجون بلبن و معمر بموتزاريلا تيجي تحفة تحفة
المقادير :
العجين فه زلافة فينو و زوج زلافات دقيق ابيض ممتاز و قبصة ملح حيت موزاريلا مالحة و عجنيهم بلبن الا معندكش ديري حليب و قطرات خل و غير جمعي العجين تكون شوية مرخوفة و ديريها في بلاستيك و خليها ترتاح واحد ساعة عاد دوزيها في يد شي دويرات و صافي شكلي منها كويرات مهم كل وحدة فيها تلاتة كرات قدقد ووحدة اكبر منهم
كتسرحي الكرة الاولى مزيان و تدهنيها بزبدة و زيت و ترشي موزاريلا و تجمعيها و تكملي هاما و نتي كترشي موزاريلا الا الأخيرة الكبيرة لي مترشيش فيها و جمعيها و خليها ترتاح عاد طيبيها ايما في مقلة كبيرة أو دخليها فران تيجي واعر هاد الخليط خرج ليا ربعة متوسطين بصحتكم جربو و ردو عليا
غداء اليوم سهل و بسيط قبلو عليا
فريت في فرن ب les herbes de Provence
اولا نقي بطاطا و خوي عليها ما طايب و شوية خل و خليها حتا يبرد الما و نشفيها مزيان تبليها بالملح و زوج معالق زيت الزيتون و les herbes de Provence لي معندهاش تكتفي بزعتر أو حبق أو معا و دخليهم فران فوق ورق طبخ و بصحتكم
البروشيط
كترقدي لحم في بصلة محكوكة ملح بزار كامون حار و قزبر يابس و زيت الزيتون عاد ديريه في عودات بروشيط مرطبين من قبل في الما والى الفرن طبعا فوق ورق طبخ و
بصحتكم
وا عشاق سفنج بانووو حدايا و تفاعلو معانا راكم جبتو لي نعاس
المقادير :
كيلو دقيق ابيض ممتاز و خمارة و 3 معالق خل و 2 معالق كبار خميرة ديال خبز عجنيه بالما دافي تكون مرخوفة خليها ترتاح عاد ديريهم كويرات و دهنيهم بالزيت و بقاي تهزي كرة و تقبيها بصبعانك و حطيها اولا في مقلة فيها شوية زيت شي نص كاس و نار مهيلة حتا تشد راسها و حوليها لمقلة اخرى فيها حمام زيت و متقلبيهاش حتا طيب و بقاي تسقيها بزيت بمعيلقة عاد قلبيها و بصحتكم
مخمر أو بطبوط بدانون مسوس
: المقادير
نص كيلو فينو او سبيسيال و كيلو دقيق ابيض و 2 معالق كبار خل و 2 معالق كبار خميرة ديال الخبز و 2 معالق كبار سنيدة و 2 دانون مسوس و ملح و ما دافي للعجن تكون عجين مرخوفة خليها تخمر عاد ديريها كويرات و كرصيهم بالفينو و خليهم يخمرو عاد طيبيهم في مقلة مدهونة بالزيت و بالصحه والعافيه
تعليقات: 0
إرسال تعليق